Viewing entries tagged
hotel

افطارنا في فندق حياة هاوس في جدة

Comment

افطارنا في فندق حياة هاوس في جدة

كيفكم يا جماعة؟ وكيف رمضان معاكم؟

والله احنا بالنسبة لنا ما في يوم عارفين نفطر في بيتنا، ما شاء الله من دعوة لدعوة ومكان لمكان، كله لعيونكم عشان تشوفوا معانا ايش محضرين لنا مطاعم وفنادق جدة في هذا الشهر الفضيل.

Saffron+Chicken

أحد هذه الدعوات كان من فندق حياة هاوس في شارع صاري في جدة، انا عن نفسي صراحة حسبت احد سارق اسم فنادق حياة العالمية وعملها فندق محلي. لكن طلع الموضوع انه مجموعة فنادق حياة المعروفة اللي نعرف منها مثلا فندق بارك حياة (لا اسمه ما هو حياة بارك لو سمحتم) عندهم شقق فندقية مناسبة للإقامات الطويلة واسمها حياة هاوس. والله الواحد كل يوم يتعلم شي جديد.

الافطار كان عبارة عن بوفيه بسيط لكن شامل، يعني اللي تحسه ما فيه أصناف بزيادة وتحس انك ضعت ولا انه مرة قليل وتحس انه مضحوك عليك. سعر البوفيه كان ١٨٩ ريال الشخص غير شامل الضريبة المضافة. والأطفال سعرهم ٩٥ ريال. عدد الطاولات يمكن ما يتجاوز ٢٥ طاولة ويعطيك المكان احساس انك في صالة بيت او مكان مريح ومش انك في مكان واسع ماله اول من اخر وتحس نفسك ضايع. انا حبيت هذا الشعور صراحة.

Hyatt+House+Jeddah+Dining

الاساسيات كلها موجودة زي اللبن والفيمتو والتمر والسمبوسك، والبوفيه نفسه مقسم ما بين سلطات، ومقبلات، واطباق رئيسية وحلى. الأكل صراحة مرة كان خفيف وطعمه جيد، يعني ما تحسه زي اكل بوفيهات ثانية لا طعم لا لون لا رائحة. وهذه في حد ذاتها ميزة جيدة يشكروا عليها.

يعني يمكن الشي الوحيد اللي ما نجحوا فيه هو الأم علي لأنه ما كان لها علاقة لا بأم علي ولا ابوه

الخدمة كانت ممتازة ما حسينا انه لازم ننادي مرتين، يمكن ساعد في كدة توزيع الموظفين وانه المكان ما هو مرة كبير. حتى المشرف كان متواجد بشكل دائم ومبتسم ويسأل كل طاولة اذا كل شي تمام.

آخر شي اقول لكم هو قبل ما نختم انه الفندق كمان عنده بوفيه سحور وسعره ١٣٦ ريال وللاطفال ٩٥ ريال. شكلنا في يوم حنيجي زيارة سحور ، اهو منها كمان الواحد ياكل بزمة… رمضان كريم

Comment