Comment

أورجانيك ايه ، اللي جاي تقول عليه

كتابة: أحمد درويش- تختخ

 

من لما كنت طفل وانا علاقتي مع الأكل وحب الأكل غير منتهية ، مش عارف هل هو بسبب انه تقريبا كل اهلي بيعرفوا يطبخوا ، ولا عشان جدتي الله يرحمها من صغري كانت بتزغطني (يعني بتوكلني بالقوة) بطاطس متغمسة بالعيش ، كأني مثلا عجل بيسمنوه عشان يتدبح عل عيد. بس كعادة كل الأهل الله يحفظهم ليكم ، عمرهم ما يشوفوا انه الطفل تخين أو مربرب ، دايما العيٌل محسود وخاسس وهفتان وبالتالي لازم ياكل أكتر وأكتر عشان يا حبة عيني لون وشه مخطوف.

 

وكبرت ولظلظت اكتر ، مكانش في حاجة يتقالي عليها لا. عايز شوكولاتة ، خد ، عايز بيتزا خد ، بيض بالبسطرمة وماله. الواحد بقت مقاومته للأكل شبه منتهية الصلاحية ، بس ده في نفس الوقت ربى عندي حب اني اجرب كل حاجة واي حاجة ، واجرب الغريب والعجيب في عالم الأكل. بس للأسف ده جاه على حساب صحتي. وبعد ما الواحد كان بس بيسمع انه لون وشه مخطوف ، بقينا نسمع من اهالينا انت ناوي تخس امتا يا ابني ، حرام اللي بتعمله في نفسك ده صحتك و و و ... الكلام مبيخلصش.

 

كفاية كلام عن الماضي الأليم، واخدين بالكم انتم من الموجة الجديدة اللي ماشية في البلد؟ بعد زوال موجة المكارون والكاب كيك ، بعدها زوبعة البرجر ، لدرجة انه اي حد عنده شوية لحمة مفرومة وبوتجاز قرر يفتح محل برجر. محل برجر لكل مواطن تقريبا. الموجة الجديدة دلوقتي هي موجة الأكل الصحي، وأنا الحقيقة مش معترض لأنه بعد موجات السكر والدهون كويس انه الناس بدأت تاخد بالها انه احنا فعلا ممكن ناكل اكل صحي ويكون طعمه مش شبه ورق الشجر ، على اساس يعني انا عارف طعم ورق الشجر عامل ازاي. 

المهم ، بدأنا نشوف حاجات جديدة وكلمات جديدة ظهرت فجأة في السوق السعودي: عضوي ، اورجانك ، خالي من الجلوتين ، بديل نباتي ، وغيرهم كتير من المصطلحات اللي كنا بنسمعها بس في الافلام الامريكاني أو لما ربنا يفتحها في وشنا ونسافر اجازة لبلاد الفرنجة. ومع الموجة دي قررت الدولة وأمانات المدن أنها تستثمر في صحة المواطنين وتوفر كمان اماكن للرياضة والمشي. التوجه الهايل ده خلاني اقرر انه ابدأ اسمع كلام اهلي واصحابي الصحيين وابدأ رحلتي في عالم الحمية والصحة وأكون واد هيلثي وحركات. وأبدأ أقول لأ وكفاية للوجبات السريعة والمشروبات اللي مليانة سكر والدهون المشبعة وغير المشبعة والبلاوي التانية اللي فجأة اكتشفنا انها مليانة في اكلنا اليومي.

فقررت أول حاجة اني ابدأ افهم آكل صح ازاي ، وافهم اكتر يعني ايه اكل صحي واكل عضوي وايه المضر وايه اللي مش نافع. رفعت السماعة (ده موبايل يا قديم، مفيهوش سماعة)  على الدكتورة دينا لاري اللي معانا في الفووديز ، قلت هي دي اللي حتحطني على الطريق الصح. 

أنا: آلو

دينا : أهلين تختخ كيفك؟

أنا: الحمد لله يا دوك ، يلا مش تباركيلي؟

دينا: ايه جالك بيبي ولا اترقيت ولا ايه؟

أنا : لا قررت أكون صحي وهيلثي

(صوت ضحك هستيري)

أنا: ايه يا دينا مينفعش كدة ، بدل ما تشجعيني؟

دينا: معلش يا أحمد لا تزعل، بس كنت فاقدة منك الأمل 

المكالمة بيننا طولت وصراحة الدكتورة ما قصرتش خالص معايا . وفهمت منها انك عشان تغير نمط حياتك تماما لنظام صحي واكل صحي طريق شاق ومش سهل، لكن مش مستحيل. 

فهمتني انه اهم خطوة للبداية هو تحديد هدفك، ويكون محدد، قابل للتطبيق، وطبعا واقعي. يعني متحلمش انك حيبقى جسمك زي اللي بتشوفهم في الجيم ولا على شواطئ الساحل الشمالي ومارينا في مصر خلال شهر ، ولا انه التي شيرت الرالف لورن اللي نفسك تلبسه من غير ما يتقطع حيخش فيك بعد اسبوعين زمن.

خلوني طيب اديكم الزبدة في خطوات بسيطة: 

1. اطلب التشجيع من أصحابك. ولو اصحابك تخان برضو ومفيش منهم أمل قاطعهم ، عادي يا عم الدنيا مليانة ناس اعمل أصحاب غيرهم. هما لو بيحبوك حيشجعوك انك تحسن من صحتك

2. ابدا بالتدريج، لو منعت نفسك من الاكل الي متعود عليه من اول يوم حتكون حكمت علي التغيير بالفشل . يعني لو متعود تفطر ساندوتش طعمية وتتغدا مكرونة وتتعشا برجر ، متروحش من تاني يوم تعيش على جزرة وزيتونة وعلبة زبادي. شيل الحاجات الوحشة من اكلك حبة حبة ودخل مكانها حاجات صحية.

3. خطط من بدري! هات لك ورقة وقلم (لو انت من الزمن الجميل زي حالاتي) او اكتب في موبايلك ولا ايبادك ولا حتى شخبط عل حيطة ، المهم اكتب انت محتاج تاكل ايه وقد ايه ، عشان لما تنزل السوبرماركت تبقى عارف انت عايز تشتري ايه ومتمشيش زي الطفل التايه بين الممرات

4. متخرجش عن أي حاجة مكتوبة في ورقة الطلبات من السوبر ماركت ، ومش معنى كدة تكتب لي شوكولاتة وشيبس في الورقة وتقول لي ما هي مكتوبة اهي. حركات الصياعة دي مش علينا. قسم الحلويات والشيبسات ده تجنبه تماما كأنك بتهرب من زيارة قرايبك الرزلين اللي مش بتحبهم

5. متحرمش نفسك من الاكل اللي بتحبه. أي اكلة في منها بديل صحي بمجرد انه تعمل فيها شوية تغييرات. ايوة حتى البرجر ممكن يكون صحي لو غيرت العيش لعيش بني واستعملت لحمة دهنها قليل وطنشت المايونيز والجبنة الصناعي. ومتنساش انه اسمه برجر مش "براجر" يعني هو واحد بس ،مش تزلط لك 3 وتقول لي ما هو صحي اهو يا عم.

 

6. ابعد عن اللوم! ممكن في يوم تضعف وتلاقي نفسك واكل ربع الكيكة اللي بايتة في الثلاجة من عيد ميلاد ابن اختك ، عادي يا عم ، مشيها ، بس اهم حاجة انها متخلكش تبطل نظامك الصحي او تقول خلاص مفيش مني فايدة ، وترجع ريما لعادتها القديمة. نفسي اعرف مين ريما وايه كانت عادتها القديمة ، بس مش موضوعنا دلوقتي.

نرجع للموجة بتاعت المحلات الصحية ، من دورنا وواجبنا كفووديز قررنا اننا نبدأ نزور المطاعم الجديدة دي. ومنها لو عجبني ابدأ اشتري منهم اكل صحي يساعدني في رحلتي الصحية الجديدة.

محل منهم كان "أورجاليشيوس" ، وهو كلمة جامعة بين اورجانك يعني عضوي ، وديليشوس يعني لذيذ. يعني من الآخر هو حاجة عضوية ولذيذة. ومش مجاملة هو كان كدة فعلا! اتكلمت مع عبد الرحمن مناع صاحب المطعم ، وشرح لي ازاي انهم دخلوا الكينوا في 12 نوع سلطة وفي 20 طبق رئيسي بطريقة مبتكرة وصحية. مش قلت لكم انه أي حاجة بتحبوها ممكن تكون صحية مع شوية تغيير؟ لا وكمان طلعوا بيوصلوا ، يعني لما أكون مزنوق في المكتب وعايز اكل كويس مش مجرد مأكولات سريعة ، بارفع السماعة على عبد الرحمن وفريقه والأكل يكون عندي خلال ساعة.

 

مكان تاني فتح من كم أسبوع هو مطعم "دار زيد" في شارع عبد المقصود خوجة. أنا طول عمري بحب المطاعم اللي ليها تاريخ ، والمبنى ده أصلا طلع انه كان بيت عيلة يوسف أبو زيد (صاحب المطعم) وبدل ما يهدوه او يبيعوه ، قرروا انهم يحولوه لمطعم يقدموا فيه وصفاتهم وابتكاراتهم. تغطيتنا ليهم كانت متعة بصرية وتذوقية، عندهم عيش اسمر خال من الجلوتين، وبيهتموا بكل صغيرة وكبيرة تخش في اكلهم. من لما فتحوا وهما اصبحوا مكان مفضل ليا للفطار ، العصاير الفريش بتاعت "الديتوكس" والساندوتشات الصحية الخفيفة ، ده حتى البانكيك يا عم عملوه بالدقيق الأسمر والموز عشان متحسش بتأنيب الضمير. مع انه عندهم بانكيك بكريمة الفستق والحلاوة الطحينية بس ده أحاول اعمل نفسي مبشوفش عشان عيني متزوغش عليه.

آخر حاجة لازم مننسهاش ، كل اللي فوق ده ملوش فايدة من غير رياضة. اكل سليم وصحي على عيني وراسي ، بس حتى لو نمشي ساعة في اليوم كفاية عشان نبدأ نحرق ما بناه الدهر من الشحوم والدهون. مش عايز تمشي ، روح جيم ، مش عايز جيم هات لك جهاز تمارين في البيت ، المهم متقعدش عل كنبة قدام التلفزيون وتقول يا رب اخس.

يلا استأذنكم بقا عشان الحق اعمل لي وجبة خفيفة وانزل امشي لي شوية ، بيني وبين الميزان ميعاد كمان أسبوع. دعواتكم ....

 

Comment